Zogam Tonzang khua ah Diamond Jubilee pawi ding leh Huhngetna

Leitungbup Zomi Catholic Kipawlna (ZCC) min tawh Laizom sanggam Zomi pih teng tungah kong hopih uhhi. Zomi Catholic Community- ZCC pen Catholic Pawlpi Zosuan teng sungpan Zomi akici kamphem aa ki ho akul lo teng kipawl khawm-in Pasian gam leh Minam ading khut kilen in mapan khop theih nang kipawlna ahihi. Kipawlna pen Zogam Siampi Bishop Felix Lian KhenThang' makaih siam na tawh kikal suan-in Tulsa Diocese phalna tawh USA gam Tulsa khuapi pen phungpi in ki nei hi.

Kalay Diocese huam sunga Zomi Catholic te leh gamsung le gampua aa Zomi Catholic teng kipawl khawm-in kisapna te ah vaihawm khop ding ngimna tawh hih kipawlna hong piang khia ahi hi. Kipawlna ah theihsa tek mahbangin Zomi tuak veve lungsim kikhat theihloh cihbang hamsatna tampi om a, tua bang teng kawmkal ah Daimond Jubilee pawi vai hong om ciangin Zomi i hihna leh sepkhopna ah minam kipawlkhop athupi na te Mipi theih dingin zong ki lak khia nuam mahmah hi. Zomi Catholic kipawlna tungtawnin Laizom sanggam Zomi pih tengin zong Diamond Jubilee ading hong lungdampih in, nopna ah I ki noppih mah bangin dahna aom ciangin zong ki dahpih ding cihpen Zomi teng tungah ki lak khia thei leng minam khat hihna sungah Pawlpi ki deidan na omlo in ki itna khat hong om dingin zong lam et na tawh hi thu hong ki vaihawm khia ahi hi.

Diamond Jubilee vai Zaksak na

Biak Pasian in Zomi te thupha hongpia in, amah I theih nang abei-sa kum 100 lai-in American Baptist Missionary (ABM) te tungtawnin Lungdamna thu Zogam ah hongpuak in ei khang sungin kum 100 cin Cope Centennial Jubilee pawipi pen November 2010 in Zogam khuapi Tedim ah nasia takin I bawl khia khin zo hi. Tua mahbangin Roman Catholic Mission (RCM) Upna khaici te zong French (Piancit) Missionary te hong zangin, I Zogam ah hong tunga November 2014 ciangin kum 75 cin Diamond Jubilee pen Zogam khuapi Tonzang ah Diocese Level in nasia takin bawl ding ki sawm hi. Hih Missionary te sungpan in Diamond Jubilee Pawi dongin hong nun takpih lai dingin aki lam-et Tuithang-Topa Fr. Blivet pen nung kum lam deuhin hong nusia khin-a, Saizang-Topa Fr. Ruellen pen tuni dong hong nun takpih lai ahihmanin ki lungdam mahmah a, zong ki lawp mahmah hi.

Calender tawh Huh ngetna

Diamond Jubilee Pawipi pen anopci pen in bawl zawh nangin ki ut mahmah hi. Biak Pasian tung leh Mission hongpai Missionary te tungah Lungdam kohna leh Pahtawi na pen alimci pen dingin ki vaihawm nuam ahihman in ZCC min tawh Jubilee pawipi adingin Fundsum zon sakna Calender khat ka vaihawm uh hi. Calender pen hoih hi, lei taak hi, nei nailo ding na hih uhciang cih bang hilo zaw-in Jubilee Pawipi adingin Huhngetna hi zaw hi. Hih Calender hong leisak/hong zuaksak tengpen Jubilee Pawipi adingin huhna hongpia in kiciam teh ding ahi hi. Gamsung le gampua pan no mau om na Pawlpi min tawh ahizongin, Zomi Innkuan, Zomi Christian Fellowship, cihbangin kipawlna min tawh Jubilee Pawi adingin nong zuaksak dinguh huhna kong ngen uh hi.

Pawlpi tuamtuam leh kipawlna community tuamtuam pan hong ki vaihawmpih tengpen Pawipi ding Huhna puak in kiciamteh dinga Central Committee te leh Kalay diocese huamsunga om pawlpi mite theih dingin akim in ki puak dinghi. Calender pen €, $, £, RM, ₹, cihbangin om na gam zat Currency in 10 leh atungsiah tawh Jubilee adingin panpih zawh zahzah hi dinghi. Kawlgam sungah 1500Ks. Leh gamlian zawdeuh teng zong muan na in $ 10 kiim leh atungsiah dingin ki lam-en hi.

Calender Lim le Mel

Calender Size pen 24" x 17" in kibawl a bu khat ah Dal-3 pha in, MALAYSIA pan ki bawl khia hi. Attach ah hong kikhak dan mah bangin Cover ah ZCC Patron & Kalay Diocese Bishop Felix Lian Khen Thang, ZCC phungpi omna Tulsa Diocese Bishop Edward Slatteryte' photo leh Kalay Diocese Map gamlim tuanghi. Tua photo te nungah background in Topa Jesu lim ki tuang sak hi. Calender Sungah ni le kha te ah nisim sim dinga akilawm Laisiangtho mun te tawh ki thuah in, Topa Jesu' Singlamteh tungah kikhaina, Sts. Peter le Paul, Naungek Jesu suah na cih bangin Hun tawh kituaka background image in ki koih hi. Calender sungah Catholic Calender ci-a zong ki suang tuanlo ahihmanin zatkim theih ding ahi hi.

Vai khak theihna mun