Gulu mual dinmun (14th March 2013)

Dear U le naute teng
Omna tek pan a damkim tek dingin ong deih bawl ing. Kithuzak loh ong sawt pian in kei om muanin na lungleng kha zezen ing.

Amasa in Gullu mual vai tawh Ygn khualzinna tawm pulak nuam masa hang. Excel Hotel Ygn , 2 – 4 March 2013 sunga kibawl “ Vanishing Treasure of Myanma” khawmpi ah Dr Do Sian le Zamthuamte tawh na kihel thei ung. Kawlgam khualu khuataw panin mi 150 kim kipha hi.

Hih hun sungah zong mikim theih dingin Gullu mual vai le Zogam a ong lut ding Investment tuamtuamte thu zong lungkim huai takin na sung thei ung. Mipi in zong ong kinak lung himawhpih mahmah hi. Gelna a om sa mah bangin E/SIA thusinna ong pia ding sia zong na mu thei ung. Ei deihna bang hizo leh tu nipi sung mahmah a kipat ding I ut hangin I sia dingte pen mai nipi sung khawngah ong pai thei pan ding suah ahih manin a mauzai mah a ngak hi mai hang.

Tedim Association, Ygn te deih sakna tawh 7 March 2013 (1 : 00 – 4 : 30 pm) in muan le suan makaipite tawh holim khopna nasia takin na nei thei ung (group mail ah om khin ). Gam le minam mit suana kikup ngiatngiat ahih manin ong thupi peuhmah hi. Hun man kuan ciangin Steven Zakhai ( Gs. TA)in “ vaksuk vaktohna le sun-an khat peuh a nekna dingin sumpi kidong ni” cih thusuak khat ong nei mawk in sumpi ong don sak uh hi.

53000 ks kingah a kawlpi ka tun ciangin ka lawmte kiangah tua tengmah ka tunpih pan linlian hi. Asum zong thupi mah a, ahi zongin a thu mahmah in hoih ka sa lua hi. Zaknop ka sa lua uhi.. Ka lungdam lua uh hi. Tua bek thamloin in a zingciangin Siapi tuanno in ong hopih a, Sia Smith in zong 10000 ks ong pia hi, ong ci lailai hi. Hih bangin gam le minam ading thu lianpite ah khangno khanglai upa le gamsung gampua khut kilenin kalsuan khawm peuhleng thu le la te ong hoih lel ding hi. “ Innkuan ki it leng,,…, Pasian in zong van pan ong nuih pih…, “ a cih bang tektek a hi dingin lamen hang.

Ko Min Ko Niang ( 88 te ) te deihsakna tawh zong Gullu mual lim le mel record hoih tak ong lak sak uh a, a sawt loin TV channel khat pan ong kikhah khia ding hi. Hih vai khempeuh ah Lawm Thatuang in tavuan na zo mahmah hi. 88 te Zogam khualzinna khempeuh pen a diakin kawlpi 88 te le upper chindwin youth network te in a kipanpih hi a, tua tungtawnin ei thu ei la zong kim takin a kihuau thei suak hi.

Tu lian laitaka Letpduang ( momwa sumngo khuk ) vai zong mipi lamet hetloh thu khat ong piang mawk ahih manin I Gullu mual vai zong mapan zia tampi I ngaihsut beh ong kul ta hi. Sun tawh zan tawh thu tampi ka na gelgel uh a, a sawt loin kiza sak toto ni.

Liantuang
Kawlpi (09400511757)