ZCD news update (05 Oct 2012)

Zomi Congress for Democracy  in tunai party nasepnate pawlkhat ong

pulak ung. Zangkong, Kalay, Tedim.Tonzang, Cikha, Haka cih bangin

Zomite tenna tengah party member kikaih khop laitak ahi hi. ZCD party

ahilo party dangte in zong member tam ngahna ding akaih khop mahmah

laitak uh zong ahi hi. Zomi party le party dangte kikal ki lamdangna

ah Zomite in ZCD member form aki hawm kal ngak zo liangin, aki hawmna

phual ah ala dingin khualam pan kuan zaw liang uhi, party dangte ahih

leh khuakim vel in zin koikoi in, pawlmi akaih khop uh hang Zomi party

mah mipi atam zaw in tha napia uhi. ZCD in zong tuni ciang dong party

form 2,000 val kihawm khin lak ah 900 kim ding Tedim ah ong lut kik ta

hi. Zangkong, Kalay, Tamu lam ah tulaitak member ki kaikhawm laitak

ahi hi. Mipi sungah member form hawm dan, mipi kaihkhop dan tawh kisai

in, genbangna, kisapna cihte tawh kisai kisam saknate, tua ci zaw deuh

leh cihte mimal kim in, nong genpih ding uh zong kong cial uhi. Sak le

khang, tuipi gal pan ahi zongin, omna tek pan party ading thapiaknate

hangin, tha kingah in ki lungdam tek mahmah hi. Tunai ZCD party pan

Zangkong lam ate nasepna pawlkhat anuai ah bang ahi hi.

1) 27 Sep 2012 in Pu Gin Kam Lian le Pu Pau Lun Min Thangte Zangkong

Special Division Paliman ah adang party 26 te leh Myanmar Election

Commission (MEC) Chairman U Tin Aye tawh kimuhna ah ZCD tangin va

kihel thei uhi. Tua munah ZCD pan Pu Gin Kam Lian in agenna ah '

kitelna tawh kisai in 1990 kum kitelna bek mah akician in tel peng

ung. 2010 kitelna ah bel BOYCOUT ungin kihel kei ung. Ko zakna ah bel

thuman lo tampi piang cih na za ung. 1990 kitel kum in bel Election

Commission in thuman tak in nasem in, kitelna ah telcing te zong hong

sang thei uhi. Aihang tua hunlai galkap kumpi in hong sang lo ahimanin

tudong mitmuh in, 1990 Election result om lo mawk hi. 2015 ciangin

democracy picing tak le thuman tak tawh akalsuan Commission kician

nong suah ding uh hong hanthawn nuam ing. No lam pan hong gina lo in,

uptak muantak na hih kei uh leh, na nung uh hong ki zui lo ding hi,

tam gen lua leng lah ong heh kha ni cin, zan diak a, NLD pan U Nyan

Win warning napiak dan tuak kha leng, ut kei ing in, tu a ciang ciphot

ning, lungdam' cih tawh thu na sung hi. Tua kimuh khopna ah U Tin Aye

in, party te in, bye-law thukhunte zuih hamtang det ding, party te

haksatna, kisapnate zong ahi thei bangin mailam ah panpih theih nading

ngaihsutna om ci'n gen hi. Tua banah, kitelna ah akizang system khat

ahi PR (Proportionals Representative) tawh kisai, athu kan in, hoihsa

ing, mailam  kimuh kik ciang PR thu kikum tolai ni ci hi.

Note: Kawlgam ah tuniciang akizang system pen Top get All kici,

kitelna ah metang atam ngah pente in, gualzo in, akitelna gam ah amah

bek azo, thunei ahi hi. Hih PR pen leuleu ah kitelna ah metang ngah

percentage tungtawn in, thuneihna ngah ding ahimanin, kitelna ah asang

pen pan gualzo lo dingin aki ummawh, party te in pakta mahmah uhi. PR

zat ding pen tulai Kawlgam adingin bel lauhuai mahmah kha thei ding

hi.

2) 3 Oct 2012 nitak lam 6:00 PM  pan kipan in  Chatarium Hotel,

Zangkong ah kibawl Unity of Germany Annual dinner party ah kah dingin

Germany Ambassy pan hong sam uhi. Tua munah Pu Gin Kam Lian le Pu Zam

Za Mung in va uap thei uhi.

3) SNLD  makai Pu Khun Tun Oo pen United State ah  NED te pahtawina

sang ding in azinna pan 4 Oct 2012 ni 9:00 AM  hun in  cidam tak in

Zangkong  Vanleng Tualpi ah hong tung kik hi. Tua munah UNA sung

kipawlpih mualtung mi party teng ahi SNLD, MDP , ZCD, ALD pan va

kidawm khawm thei hi. Inn tunkhit ciang tawlnga lo in,  thu kikupna ki

nei henhan pah hi. A zinkal in Kawlgam ah gamvai thupiang te inn lam

ate in genna le USA lam ah atuah khak thute hong gen kikna nei hi. USA

ah ZCD makai Pu Chin Sian Thang tawh thum vei ka kimu man uh ci hi.

UNA in Kachin gam ah tualgal vai le Rakhine gam ah Bengali tawh buaina

te current issue pi khat in len in, van theih bangin panmun la in,

nahoih sep ding gen masak in nei pen hi. Amah pen USA atun khit

ciangin Kawl kumpi lam pan, UN ah kah ding kumpite delegate ah kihel

ding acial uhi in, acidam lohna tuamtuam hang tawh kihel ngap lo

ahimanin anial kik hi. Zangkong hong tun ciangin zong vanleng tualpi

ah wheel chair tawh hong tuak hi. Inn atun ciang aci hong dam zaw deuh

in, wheel chair kisam lo in, pai thei bilbel hi.  Pu Khun Tun Oo

dawnna ah ZCD pan in Pu Gin Kam Lian, Pu Pau Kim Tuang le Pu Eng Biak

Thang te va kihel thei uhi.

--

ALD - Arakan League for Democracy

MDP - Mon Democracy Party

NED - National Endowsment for Democracy

SNLD - Shan Nationalities League for Democracy

UNA  - United Nationalities Alliance

ZCD - Zomi Congress for Democracy

Kim Tuang

Info Team

Zomi Congress for Democracy

5 Oct 2012