Zomi te sung ah akisam khat ah hi, Zogam ah FM Radio station neihzawh nading in, Leitungbup Zomi Innkuan (LZI) kipawl na' hanciam nate, attached file ah PDF file tawh kong tangko uhhi.
Zomi a'kuamapeuh in Sum leh pai ahizong in, thu leh la tawh ahi zong in, i'om na mun tek pan in tha pia ciat ni.
Hih FM Radio project ma'tut zawhna ding, mimal khat ciat panpihna, a'munmun a'om Zomi Innkuan te leh, Zomi kipawlna tuamtuam te, hong ki muang ahihna zong kong theisak nuamlailai hi.
Mimal ading hilo a, gam leh minam ading ahih man in, gam leh minam a it note tawh, mapangkhawm ding in, Leitungbup Zomi Innkuan (LZI)kipawlna in, hih bang in, hong tangko ka hi uhhi.
Gam leh Minam a'it, avei note tawh,
(Go Sawm Khup, Pu) (Kap Suan Lian)
President (LZI) General Secretary (LZI)
_______________________________________________________________________
Leitungbup Zomi Innkuan Kipawlna
Executive Council
Date: June 27, 2013
Thupulakna : Zogam ah FM Radio Station khat lam zawhna ding hanciamna
Leitungbup Zomi Innkuan (LZI) Kipawlna vaihawmna tawh Zogam ah FM Radio Station khat, 2013 kum sungin, a kilam zawhna dingin hanciam dingin Executive Council pawlin khensat hi.
Zogam ah FM Radio Station khat lam ding vai tawh kisai in, LZI Kipawlna in anuai a bangin, Ngimna kinei hi.
1. Zogam sung ah Zokam tawh thu leh la taangkona ding
2. Gam leh minam, khua leh tui tawh kisai ngaihsutna leh sandan tuamtuamte pulakna ding
3. Khua leh tui sung ah kilemna, kithuhualna, kipumkhatna akhan semsemna ding
4. Zomi-te sung ah thumaanna, diktatna, thukhualna leh picin’na akhan semsemna ding
5. Zomi-te sung ah thutheihna, pilna, gam leh minam itna akhan semsemna ding
Zogam ah FM Radio Station a kilam zawhna dingin, LZI Kipawlna min tawh Executive Council in a vaihawmna pen, tuipi galkaai Zomi khempeuh khut kilen in ma pankhop dingin kizawn hi.
Hih maban pankhop theihna dingin, muntuam gamtuam a om, Zomi Innkuan kipawlnate leh Zomi kipawlnate khempeuh tung ah pankhopna ding zotna kibawlkhin hi. Zomi kipawlna Makaite tungtawn in pankhopna dingin a kizawn hi a, hih maban tawh kisai a thei nuam khempeuh in, a munmun a om, Zomi Innkuan kipawlna leh Zomi kipawlna Makaite tung ah kikan thei hi.
Hih maban ah mimal hanciamna tawh ma ahong pangkhawm nuam, laizom u leh nau akua mahpeuh, itna tawh hong kimuak hi. Sum leh paai ban-ah, pilna siamna tawhzong ma kipangkhawm thei hi.
Zogam ah FM Radio Station a kilam zawh ciangin, a min dingin “Zomi FM Radio Station” minvawh dingin kigeel a, atom in “Zomi FM” in kiciamteh hi.
Zogam ah FM Radio Station khat lam zawhna ding hanciamna leh Zomi FM tawh kisai thu leh la khatpeuh a thei nuam, a kan nuam khatpeuh in, LZI Kipawlna, Executive Council panmunlente tung ah kidong thei, kikan thei ding hi.
Executive Council
Leitungbup Zomi Innkuan Kipawlna
(Go Sawm Khup, Pu) (Kap Suan Lian)
President General Secretary
