ZuaPate’ Ni pen leitung mun tuam tuam ah June kha nipi thumna hunin kizang zel hi. Pate’ Ni pen kum zalom 20th na hunlai in United States pan hong piangkhia hi. Pate Ni a mukhia pen Sonora Smart Dodd ahi hi. Aman kum 1910 in Spokane, Washington ah phuankhia hi. A lawpna masa pen kum 1910 June 19 in Spokane, Washington YMCA ah kinei hi.
Sonora Smart Dodd pen a pianna Arkansas ahi hi. A pa pen William Jackson Smart hi in unau 6 pha uh hi. Mrs. Smart Dodd in kum 1909 a Nute ni zatna ah Pate’ thupina gen hi. Pastor te kiangah Nute Ni aki zat mah bangin Pate Ni zong zat dingin ngen hi. Ama’ deihdan lianah bel June 5,(apa’ pianni) pen Pate Ni dingin deih hi. Ahizongin Pastor te tuani a hunzat ding deih bangin kiging man lo uh ahihmanin June kha nipi thumna kizang hi.
Mrs.Smart Dood ngaihsutna pen US President Woodrow Wilson in zong hoihsa hi. Tua ahihmanin kum 1913 ciangin Holiday a zat dingin Congress in gel hi. Kum 1916 ciangin Pate ni lawp ding hong ngaihsun uh hi. Kum 1926 ciangin National Fathers day committee bang New York ah kiphuankhia hi. Kum 1956 ciangin National Fathers day Committee te thusun US Congress in kipsak hi. Kum 1966 in US President Lyndon B. Johnson in June Nipi thumna Pate Ni dingin pulaak hi. Kum 1972 ciangin President Richard Nixon in US gambup zum khakni a zat dingin zasak hi. Pate thupina kitel sem sem ahihmanin US bek thamlo in leitung mun tuam tuamah Pate ni kum simin kibawl zel hi.
Nidang lai pek pan in pate thupizia kiam ngei lo hi. Pa cih kammal pen zahtakna lam genna ahi hi. Nute sangin pate mah kizahtak zaw takpi hi. Innkuan sungah pate mah in vaihawm leh nuam hi. Numei vaihawmna inn sung pen zahtak huai lo hi. Numei lutangin pasal hi Pasian thu in a cih mah bangin numei ten zong pate zahtak siam ding thupi hi. Sum leh paai kitangsap tak ciangin nute sangin Paten hong huh thei zaw uh hi.
Pate Ni in pate pahtawina dingin gift tuam tuam kipia hi. Pa a dam laite red rose kipia pi pen a, a sikhin pate phawk nangin white rose kizang hi. Pate ni hong tun ciangin na pa alungdam theih nangin gift pia in. Neek leh dawn, silh leh teen leh gamtat kampau tawh na pa na itna kilangsak in. Na pa a sikhin ahih phial leh zong a han ah hawh in phawkna leh pahtawina nei in. Laisim khempeuh Pate’ Ni zatnuam, Happy Fathers’ Day!
