Mangte Chungneijang Mary Kom (M.C.Mary Kom) pen 1st March, 1983 in piang hi. A pa Mr. Mangte Tonpa Kom hi in a nu Mrs Mangte Akham Kom ahi hi.Amah pen a unau sung pan un a upa pen ahi hi.Pianpih unau numei nih leh pasal khat nei hi.Mary Kom a neu tung aki pan in kimawlna lam a lunglut mi khat ahi hi.Class VI dong Loktak Christian Mission School, Moirang ah sin in VII- VIII, St.Xavier School, Moirang ah sin hi.Class VIII a passed ciangin Adimjati School, Imphal ah lut hi.Kimawlna lam lunglut ahihmanin Sports Authority of India, Khuman Lampak zawm hi. Coach leh mentor, Shri. Ibomcha Singh kiang pan sinna nei hi.Tua pan in kimawlna lamah mi lawhcing khat hong suak hi.
International Boxing Association(AIBA) ah 5 vei World Boxing Champion hi khin hi.World Championship ah guk vei medal a la thei numei amah bek ahi hi.June, 2012 in AIBA a Women’s category ah World No.4 ahi hi.London a Olympics kimawl nangah Mary Kom India aiawh dingin kiteel hi.Indian numei boxer lakah London Olympics a kimawl ding a qualify thei omsun ahi hi.
Manipur kumpi in Sub-inspector of police nasepna kum 2005 in pia uh hi.Kum 2008 ciang inspector of police ah lamsang to uh hi.Kum 2010 tak ciangin Deputy Superintendent of Police (DSP) ah promote to kik uh hi.Tun zong Indian Territorial Army ah Honorary Lieutenant Colonel hihna kipia ding hi.Indian numei lakah defence lam Hononray Lieutenant Colonel hihna kipa masa pen ahi hi.
Samulamlan Block a om K.Onler Kom tawh Delhi ah ki mukha uh a 12th March 2005 in Manipur Baptist Convention Church ah kiteeng uh hi.Tu in ta nih nei ta uh hi.
Mary Kom in, “Olympic ah kimawl thei dinga ka cin man in nuam ing.Ahizongin hih competition ah medal khat beek la lo a ciah ding ut keng.World Championship sangin Olympic ah kimawl tawmzaw ding ahihmanin a khatveina ka zawh leh quarter final kilut to thei pah ding hi” cih gen hi.
I unaunu Mary Kom a lawhcin zel nangin deihsakna sang pen i pia hi.
