Gullu mual dinmun (19th February 2013)

Kawlpi ah bel Zomi Namni vai in dungdung dangdang kisa in gam lum
mahmah ei. Ko pawl bel Zomi Namni le Gullu vai lemtuah in na manlah
mahmah ung.

Zani ( 18 Feb 2013 ) Zamthuam, thatuang le Letpanchaung khangnote
kikhawl in Singzung khua pam Aung Wa khua va pai uh hi. Khua nu
khuapate tawh kimu in Gullu vai mah lungkim huai takin va kikum thei
uh hi.  Ataktak in Aung Wa khua le Minlah khua pen company tawh a
kinai ( kizom ) khua in a kingaihsun hi a, ei lam panin Falam, Hakha,
Hualngo,…, kim takin I kihel khit ciangin a kinawk pan ahi hi.

Siamsinte maithak muakna ( 16 Feb 2013 ) thu pen I gen sa ahi phial
zongin ka lungsim ong su kha mahmah thukhat om ahih manin tawmkhat
kihawm sawn nuam kik hang. Tua ni pen zingsang lam tawntung meeting (
Youth Center ) a kibawl hi a,  meeting man hun ( 12 : 30pm )  ciangin
na pai thei pan ung. Gullu mual ka tun uh ciangin amau’ biakpiakna hun
na man nailo uh a, Fr Suan  in hanthotna na pia ziahziah hi.Hun man
ciangin  Tg Zamthuam makaihna tawh tawpna la dingin Zo lapi khat ong
sa zenzen uh hi.

A:     Zotui momno ei mau pheiphung,
         Guallai sawlbang hei theileng ci’ng e.
B:      Guallai sawlbang hei theileng ci’ng e
          Pupa gamzang nahzu bang puah in, tungciang alsi khat in
taang  ci’ng e, …,

ci in zai ziahziah uh hi.  Awi diahdiah uh hi. vail thum a sak khit uh
ciangin Gullu ( a lu lam ) nga in ong kihei diam uh a, khut van sa in
vial khat ong sa leuleu uh hi. banghang cih om lianlo pi in khitui na
mualtung lawh kei hel ung.  Tua khit ciangin u  Thawnkham’ la “  Zogam
“ (  Zogam aw ken ong taisan kei ning. Zogam aw na kha nuai ah ong sel
aw……..) ci in zai ziahziah mai uh hi. Khangno tingteng 150 kim in
thangah takin a sak uh pen mualkuam guamkuam ah thawn vangvang a,
keima lungtang mahmah ong kap kha lian hi. Hih bang hun lianah bel ki
pasal sakna ciangciang lel tawh khitui a kikham zo bang hi deksuailo
hi.

Zoni Namni pen Siamsin tengtawh Gullu mualbul ah pawipi kham dingin I
gelsa hi a, ahi zongin mikim ong kihel theih ding lunggulhna tawh ( 24
Feb 2013 ) dingin na khinto ung. I theihsa mah bangin Kawlpi ah zong
kipawlna tuamtuam in Zomi Namni kibawl ciat hi, En zong bawl veve lel
ni ci in ka na kikumkum zel uh hi. Ahi zongin mun nih munthum ah pawi
a kibawl pen athusia ahih loh hangin ei deihna taktak pen Gullu vai le
Zogam mailam ding thulianpite i vek pi in  khut kilen in ma pan’ khop
ding lunggulhna hi bulpi zaw ahihmanin mun tuamtuam a, pawibawlte ong
kihel theih hun dingah a khin to I hi hi. Tua pawi ( khawmpi ) zong
thu le la, sum le pai omsa tawh kivaihawm hi lo a, upna bek mah tawh a
ki gelgel hi mai hi.

Liantuang
Kawlpi (09400511757)