Cope Topa’ zi, Tonu Elizabeth S. Cope ong itna

Cope topa Haka ah dam lo-in a gim mahmah ciangin, Cope tonu in zong dam lo pipi ngap lo pipi mahin a pasal aitna tawh Tedim pan’n va delh suka, Falam a tunteh topa’n ong nusia ta-in kivui khin ta hi cihthu a zak ciangin Tedim lam zuanin ong ciah kik zaw hi. Cope topa pen 1938 6-11 ni-in topa Strait khut tung pan’n ong nusia hi. Elizabeth tonu in a genna ah, a sisa a lawmpa’ maitang mu a, a khantawnin a mit kha ah a luai den ding sangin a cidam lai-a, a mai puakte a mit kha ah a luai den ding utzaw ahihna le Falam pan’n Tedim ah cidam takin kileh kik pah henla, topa Cope’ nasep maban a zop theih bangin zom thei kik leh tanglam zaw ding a hihna thute ah, a itna ong nuntakpih zawa, Zomi te mailam ah itna ih nuntakpih zia ding lam ong lak ahi hi.

Haka ah ngap lo pipi-in va pai suk teitei leh a nuntakna zong sup lawh sawnsawn thei dinga, Cope topa’ nasep Tedim ah hoih takin kizom siang zolo kha ding cih a nungta itna tawh Tedim khua ah a tate ong kem dingin ong ciah kik hi zaw hi. A pasal a it lo hi lo hi. Ei Zomi te’ saan daan hi leh a pasal it lo hi ih ci ding hi. Hih lai mun ah tonu in topa Cope a itna a nuntakna tawh a lahna pen Tedim-Zomi te’ ih hamphat lawhna zong hong suak sawnsawn hi. Vaphual ki-itna pan’n Singlamteh ki-itna ah kinuntakpih in, koici kalsuan, koici nuntak ding cih tonu Elizabeth S. Cope in ong hilh na hi gige hi. Vaphual banga kimawk sihpih ding hi lo a, tonu le topa Cope banga lamet nei Singlamteh masuan ki-itna tawh kinuntak pih a, ih pasal ih zite in hong nusiat leh a maban omlaite ih sih dong maa ih panpih ding hi zaw hi.

Vaphual ki-itna, ganhing ki-itna sangin a thupizaw khat om a, tua pen upna ahi hi. Ganhingte a ki-it mahmah theih tei uh hangin upna nei thei lo uh hi. Ganhingte sangin mihingte ih pilzawkna tua upna thu ahi hi. Tua leh leitung ah pilna sangin a thupizaw bang om a hiam? Pilna sangin a thupizaw Upna thu om hi. 1 Corinthians 1: 18, 19na ah, Banghang hiam cih leh sihna a thuak mite-a’ dingin singlamteh tungah Khrih a sihna thu pen a haihuai thu ahi hi. Ahi zongin hotkhiatna a ngah eite-a’ dingin Pasian’ vangliatna ahi hi. Banghang hiam cih leh Lai Siangtho sungah “Mipilte’ pilna ka susia dinga, miteite’ teina ka heikhiatsak ding hi,” ci-in kigelh hi. Ahi zongin kote in singlamteh tungah a kikhai Khrih thu ka hilh uh a, tua thu pen Jew mite-a’ dingin a hehhuai thu hi a, Gentail mite-a’ dingin a haihuai thu ahi hi (1 Cor. 1: 23).

Nang e leh, Jesuh Khrih tangmi dingin ong sihna hehhuai sa na hia? Haihuai sa? Kei’n bel uphuai sa ingh. Ganhing ki-itna in a tel zawh loh, mihing pilna in a tha-lawh zawh loh, Jesuh Khrih’ ong tatkhiatna thu upna pen leitung vannuai ah mawhnei nang le kei aa dingin a thupi penpen na kisap penpen Pasian’ vanzat (God’s means) ahi hi. Cope tonu Elezabeth in a upna tawh a itna ong laka, Cope topa Herbert Cope in a upna hih bangin Zomi te’ leitang tungah a lutang ong phumna tawh ong lak hi.

Suang Dal