Lai at & Lai gelh cih zatzia

Muhdan tuamtuam kikum hile'ng, "LAI AT" leh "LAI GELH" cih kammal zatna thu ah ken hici bang in ngaihsun ing.

Tuhun ciang ki "At" lo hi. "GELH" cile'ng man/dik zawdeuh tawh kibang a ahih hang man/dik khin tuanlo hi. Banghang in tuaci kahiam cih leh, tu-a kong laikhak zong, ka smartphone kazat ahih man in, "Kawk" hi'ng. Tua ahih leh laikawk ong ci le'ng hi isa diam?

Leitung khantohna tawh kizui in vanzat kikhel toto ahihman in i nasep zia zong aki laih toto ahi hi.

Tua ahihman in, 
1) hunkhat lai in lai ki-at hi. Suangpek tung ah, Savun tung ah cihbang in azum, ahiam khat zang in ki at hi.
2) hun ong kikhel in, ki khangto a ki at nawnlo in kigelh hi. Laikung zang in laidal tung ah kigelh hi. Tua mah tawh ahun kibang in laikhetna set zang in kikhen hi.
3) tuhun ciang lai ki gelh a, zong kikhen in, zong kikawk hi. Laikhak nangawn, laikung laidal zanglo in kikhak hi.

Minam kician khat ihih leh ngeina kip, pau le ham kip, lai kician ineih ding a kisam ahi hi. Ahunzui a khel ding pawlkhat a om hang in khelloh ding pawlkhat zong om hi.

1980 khit deuh pawl a ka lai simkhak Pu Major Stephen Khup Cin Pau' thului khat thupi kasa hi. Ama' genna ah Zomite laitawh kisai in i kammal zat "at" icih in i tangthu a gen, tangtawng pek a i mansuah, tangthu bek a itheih savun tung a lai ki-at ineih thu a gengen hi... ci hi.

Lai at cih kammal i zatna in Zomite mi mawkmawk hilo, laikung laidal aki zat ma, sing leh suang leh savun bek a kizat hun lai pek a "lai" anei minam i hihna ong gen, "at" cih kammal in tua thu ong kipsak ahi hi.

Tuhun a lai anei pan hile'ng, laigelh zong cilo in lai sun ahih kei leh lai kawk cih bang peuh zat ding himai kha ding hi.

Tua ahih man in "lai at " mah ci hohni aci nuam kahi hi. A at bel zum leh hiam zang in at hetkei mah hang. Ahih hang, "at" cih kammal izat sim in i minam tangthu gen a, a angtang ihihna hizaw ding hi.

Minam itna sung ah,

Pau Khat Suan