US gam sung a om Zomi buppi tang’in Zomi Innkuan USA kipawlna vaihawmna leh Zomi Innkuan Oklahoma kipawlna innteekna tawh, “Cope Centennial Jubilee” pawipi (CCJ) pen, October 9, 2010 (Saturday) ni, nitak nai 7:00PM pan 11:00PM hun sungin, Oklahoma gamkee Tulsa khuapi sung a om, Hotel minthang pen khat ahi Marriott Hotel sung ah picing tak leh limci takin kibawl zo hi.
2010 kum in Zomi-te tung ah Pasian thu hong puak a, gamtat luhek dan leh zia leh tong hoihte (Civilization) hong pantah in, Zolai ahong bawlsak Sangmang Cope topa pen Zogam a hong tun’ zawh kum (100) a cing hita a, ama kipiakkhiatna leh a sepna a bawlnate hangin Zomi-te hi bang dinmun kitung ahih manin, ama tung leh Anungta Pasian tung ah lungdam thu ko a, pahtawina a pia dingin hih pawipi a kibawl ahi hi.
Hih CCJ pawipi asiim Zomi numei naupang vekpi mimal (1,200) kipha a, US gam sung a om Zomi buppi sung pan seh li suah seh khat val in pawi asiim ahi hi. US gam a Zomi-te khuapi Tulsa a kibawl ahih mahbang in innteekte simloh, khual pan Zomi zin leh leeng mimal vekpi (300) kiim in pawi hong siim thei hi.
Hih CCJ pawipi ah Sangmang Cope topa pawlpi ahi, Germantown Second Baptist Church pawlpikem Pastor, Rev. Ernest R. Flores leh Tedim khuapi sung a om Cope Memorial Baptist Church pawlpikem Senior Pastor, Rev. Khup Khen Pau in Zinmangpi (Chief Guests) panmun hong la uhhi. Zahtak Zinthupite ahi Sangmang Cope topa’ tupa Robert Cope (Orlando, FL) leh a tunu Christine Cope Dudley (San Francisco, CA) in pawi hong muak thei uhhi. Tuamah bangin, zahtak Zinthupite sung pan Sangmang Nelson topa’ tanute ahi, Lois Nelson Myer leh a pasal, Karen Nelson Cox leh a pasalte inzong pawi hong muak uhhi.
Hih CCJ pawipi asiim dingin US gam sung a om Zomi Innkuan kipawlna tuamtuam pan Makaite, Tangmite leh Palaite mimal vekpi (30) val hong kuan thei hi. Tuamah bangin US gam sung a om Zomi Pasian nasem Sia Siama mimal vekpi (40) val in pawi hong muak uhhi.
CCJ pawipi a kipatna dingin pawi sapna lasakna leh, innteek khangnote in US gam dialkhai leh Zomi Innkuan dialkhai lapna kibawl masa hi. Innteek sung panin Far East Mission Church pawlpikem Pastor, Rev. Cin Khaw Kham in hun-ukpi (Master of Ceremony) sem a, Zomi Innkuan USA kipawlna President, Dr. Chin Do Kham in thukong honna thugenna (Presidential Speech) hun zang hi. Zinmangpite gel in Jubilee Zampi (50) veituak, avekpi in (100) vei, hong tum uhhi. Dr. C. Thang Za Tuan in “Cope leh Zolai” thu, Zomi Innkuan USA kipawlna Vice President, Rev. Thawngcin Khan Taithul in “Cope tangthu leh a nasepna” thute hong sut uhhi.
Christine Cope Dudley leh Robert Cope inzong CCJ pawipi bawlna tawh kisai a lungdamna uh leh mipi muakna thugenna hong nei uhhi. Tuamah bangin Lois Nelson Myer leh Karen Nelson Cox in khitui luang kawmsa in a lungkimna uh leh mipi thapiakna thugenna hong nei uhhi. Zinmangpite ahi Rev. Ernest R. Flores leh Rev. Khup Khen Pau in Lai Siangtho siksan in thapiakna thugenna hong nei uhhi.
Pawi hunpi sung ah Zomi Innkuan Oklahoma kipawlna min tawh Tulsa khuapi sung a khuanu khuapa, nungak tangvalte in Jubilee Lapi “Lamhilh Aksi” hong sa ziahziah uhhi. Pawisiim khempeuh inzong mipi la dawng (4); “Tuun sung khat piang Zomi namte”, “Pasian a min thang hen”, “Nang na lian hi”, “Hong leeng in gee” cihte kisakhawm ziahziah hi.
Oregon gamkee, Portland khuapi pan Rev. Zam King Mang in hun leh vai khempeuh apna thungetna hun hong zang hi. California gamkee, Alhambra khuapi pan Rev.Dr. Chin Khua Khai in Sangmang Cope topa hong kipuak manin lungdam kohna thungetna hun zang a, Kawl gam panin ahong zinzel Rev.Dr. Dam Suan Mung in Zomi buppi a’ding thungetna hun hong la hi. Louisiana gamke, Bossier khuapi pan Rev. Kham Za Nang in sumpi apna thungetna hun zang a, Ohio gamkee, Columbus khuapi pan Rev.Dr. Tung Za Pau in hun leh vai khempeuh zawhna lungdam kohna thungetna hun zang hi.
Innteek Zomi Innkuan Oklahoma kipawlna tang’in, Rev. Ngo Suan Thang makai in khuanu khuapa, nungak tangvalte in Zongeina lapi dawng (3) sa in Zongeina laam hong lak uh a, Dr. C. Thang Za Tuan hong tawn keukeu hi. Rev.Dr. Dam Suan Mung inzong Jubilee Zampi hong tum valval a, lasate siam, a laamte kilawm, khuang leh zam kitum pen ngaih mahmah hi.
Zomi Innkuan USA kipawlna min tawh Zinmangte lungdam kohna pahtawina (Gifts) piakna pen kipawlna Assistant General Secretary, Pa Vung Lian Mang in hong makaih a, pawipi tawh kisai thu pulakna, zin leh leengte muakna, lungdam kohna thugenna hun pen kipawlna General Secretary, Pa Go Sawm Khup in hong zang hi.
US gam sung ah CCJ pawipi bawl dingin Zomi Innkuan USA (ZIUSA) kipawlna Board of Directors pawlin vekpi thukimna tawh a khensat hi a, a vaihawm dingin Executive Committee thu apiak ahi hi. Pawipi limtak in a kibawl theihna dingin ZIUSA kipawlna Executive Committee in Cope Centennial Jubilee Celebration Committee khat, tual sung a ZIUSA makaite leh innteek pawlpilian teng sung pan siate leh makaite cialin kivaihawm hi.
Hih CCJ pawipi tawh a kituak in, pawipi ni sun in, US gam sung a om Zomi Innkuan kipawlna tuamtuam pan Makaite, Palaite, Tangmite leh US gam sung a om Zomi-te makaih pawlpite pan Siate leh makaite, zinmangte khempeuh tukhawm in, sun-ankuang umkhopna hunnuam khat kibawl thei hi. Tua hun sung ah zinmangte tawh holimna nuamtak in kibawl hi.
(Theih ding : Pawipi tawh kisai lungdam kohna, zin leh lengte min khumna, zindote min khumna, vaihawmna khempeuh a kicingin, atuam in (YouTube tawhzong) kipulak ding hi. Hih Thupulakna tawh US gam sung a kibawl CCJ pawi hun-geelna hong kikhakkhawm hi.)
Thupuak;
Thuvaanpi
Executive Committee
Zomi Innkuan USA
Cope topa Zogam tun kum za cin, USA ah pawpi ki lim bawl (2/2)
Info Post
