ZIB te'n Gullu mual nasepna aa ding piakhia

Gullu vai mapanna dingin ZIB ( Zomi Innkuam Buffalo, New York state ) ong khak uh sum 100,000 ks pen 18th April 2013 in na ngah ing.

Gamle minam itna veina linlian tawh ong kipia khia hih sum pen kei le ka lawmte ong kipia hilo a , gam le lei minam adingin a kisukkhia khua-ul sisan hi cih ka phawk kha hi. U te naute aw lungdamna lian mahmah hi. Hih bangin I pan theihna tek pan khut kilenin lung kituakin thasan khawm diamdiam leng I thu I la te ong hoih semsem dinga I veng I pam lakah zong mipi kitang tuam mahmah ding hi.

Lungdam diakna

Sum khak ding pen 15 April 9 : 30 am in Peter Mang (ZIB, lutang ) in phone tawh ong hopih ngiat hi. Mel kimu ngei ta keileng thuhoih khatah ma pang khawm ding cih thulu tawh kiho pen ong nuam mahmah mai hi. Tua bek tham loin Joseph Sawm Tun ( ZIB, Gs ) in zong tu zingsangin ong ho leuleu a, hih lampan laikhahte zong sim tangtang ahihna, mapanziate a thangahna, ,,,…., thu tampi ka kiho uh hi. Phone ka khiat khit ciangin thu ka ngaihsun phapha hi.

I zakzak sa thu ahih hangin ka phawkthak thu khat ong om hi. Sak le khang mun tuamtuam a om u te naute aw, innphual-a om nu le pa, u le nau, beh le phung, veng le pamte in alunggulh tawntung, a kisap tawntung uh pen sum ( money ) bekbek hi peuhmah lo hi. Agamla pi munkhat pan in “ dam maw. Na ankam a lim hia, “ cih kammal khat in sum tawh lei theihloh lungnopna khamuanna cidamna tampi piangsak zo hi cih phawk kha ing. Inn-ngakte in zong na dam uh hiam, na gim lua uh hiam, na giah na khawlna a lem hiam, …, I akno keuh in ??? pha, I vok gol ta, I bawngpi san pen gai kik ta,…, I ni I gangte I pi I pute zong dam buang uh hi” ong ci nuam ngelngel ding uh hi. Melmuhloh tong ka san nuam ka sak luak man hi.

Thunget cialna

Gam le lei minam itna tawh gim le tawl nangawn phawk zo loin a kisukkhia nate ( sum ) pen vang nei mahmah dingin ka um hi. Thahat mahmah dingin ka um hi. Thu nei mahmah dingin ka um hi. Gu nei mahmah dingin ka um hi. Gau nei mahmah dingin ka um hi.

Hih Gullu vai dinga ong kikhak sumte khempeuh pen a piakhiate lunggulhna ahi gam le lei kilapsang nadingin lei hoihna-a akia khaici bang ahih theihnadingin thungetna tawh ma ong panpih lai un. Ko te ( kei le ka lawmte ) pen hih bangin mipi’ sum ( gam le lei ading a kipia khia ) te a zek a zang siam dingin bang mahmah hilo hi ung. Ka zatkhialh ding uh lau mahmah hi ung. Tua ahih manin muibun takin le tangzai takin a kizatna theih nadingin zong ong hanciam pih lailai un
.
Tuibuah pawi sung hunzatzia

Naseppih ahi Lawm Thang Khan Tuang ( thatuang ), Ampi ( Egress )Bia Za Mung ( siamsin ), Cinpi ( Siamsin ), Pau Tawi Thang (siamsin ), Sianpu ( MIT ), Lai Mihmaw ( Siamsin )….cih te pawl Siamsin medical trip ah va kihel uh a, tua lai ah Active citizenship, human right, tu lai kawlgam / leitung khuahun luanzia, 2008 thukhunpi hilhcianna …., cih te pawl zong a hun zui in thusinna neih pih dingin kigel hi.

U Michel Hangpu bel Thuklai ah Kum 100 cin pawi sim in va pai a, tu laitak kawlpi ah Zamthuam, Haunu, Nunu cih te pawl inn ngakin na om ung. Khua sungah tui kibuakbuak ahih manin kivak khia thei khollo hi.

26 March khawmpi laibu zong Sia Daipau ( distract officer, piankyazi , kalay ) in proof reading a bawl laitak hi. Kei bel gelna a lem leh zingciang Tedim na pai toh sawm ta ing.

Liantuang
kawlpi ( 09400511757 )