Zogam, Tedim gam sung a om Zomite' neihsa gou lianpen le a thupi penpen ahi Gullu mual le Uiphuk mual Sikngo hong lakkhiatsak sawm ahi Sen (China) le Kawl kumpite' tungah lungkimlohna pulakna (Demonstration) pen World Zomi Congress (WZC) panlakna tawh leitung gam tuamtuam a om Zomite in June 30,2013 ni-in kithutuak takin neihkhop ding khensatna kinei hi. Tua thukimna tungtawn in US,Washington DC Area a om Zomite in June 28,2013 ni-in Washington DC, Myanmar Embassy zumpi mai leh Australia gam a om Zomite in zong Zomi Association of Australia (ZAA) makaihna tawh June 30,2013 (Sunday) ni mahin Canberra khuapi, Myanmar Embassy zumpi mai ah thupitak kineithei ahih manin Zomite kipumkhatna etlawmin khantoh vai le lawhcin gimnam mahmah ta hi.
Tua mah bangin India gam New Delhi khuapi a om Zomite in zong Zomi Inkuan Delhi makaihna mah tawh mipi' kimpen ni ahi July 10,2013 ni-in New Delhi, Myanmar Embassy mai ah Lungphona nasiatak nei thei uh a, Delhi Zomite in minam le i gam it thei mahmah uh ahih manin, Bus 7 dimin mipi kipaikhia phengphang cih thu Zomi Innkuan makai khat ahi Pa Khaibawi tungtawn in kizasawn hi.
Lungphona hunpi pen Zomi Innkuan Thuzekpi in makaih-in, Rev. Nang Suan Lian in hun-ap thungetna nei a, tua khit phetah mipite daikhipkhep in World Zomi Congress te' phuah Zogam Lapi kingai dimdem hi. Tua zomin Zolai, Kawllai le Manglai tawh kigelh Gullu mual thu Statement simkhiatna kinei hi. Tua banah Sologo tawh mipite tawlpikhat sung ki-awng ziahziah in, Mang Meida, Kawl Mediate akipan Delhi Zomi sungah Media lam aminthangpen Bruce le Ninglun te in zong limtak Record bawl khengkhang uh cih kiza hi. Zomi Innkuan Delhi pan akila Video zong mipi muhtheih ding asawt loin Youtube ah hong kikoih ding cih thu Pa Khaibawi in genbeh hi. Tua banah Gullu mual tawh kisai Mikang lai tawh kigelh Memorandum khat India Prime Minister Manmohansingh le China Embassy of India tungah piak lai dingin gen uh hi.
Tutung Delhi Zomite Gullu Mual Lungphona tungtang ah Pa JK Lian Thang (USA), Tg. Thangpi Naulak ( Tongsan Pen Award 2012 Winner, India) le Pa Sing Cin Mang (USA)te huhna le Zomi le Zogam a lainate panpihna hangin, Bus 7 kizanghthei banah nektheih tuamtuam zong kinekhawm zo ahih manin, Zomite mapankhopna le kithutuahna mahmah nuam zungzung hi ci-in Pa Khaibawi in gen hi. Hih bangin minam le gam ading a piakhia sanggamte Topan thupha dimlet hong piaksak hen a, mai lamah akipiakhia zo semsem dingin lawhcinna hong mu behbeh uh hen cih Zomibup thungetna hisak ding hi hang.
Europe gampi sung pan Norway Zomite in zong July 14,2013 (Sunday) ni ciangin neih ding khensatna neikhin uh a, lametloh laitak in Pa Zam Suan Thang @ Thangta, Laitui khuami in a nasepna Industry sungah tuahsiatna tuakin hong nusiat vatna tawh kidinkhawl ahih manin, tukha July kha bei ma teitei a neih zawhna dingin Lungphona vaipua makaite ahi Sia Thang Khan Thawn le Sia Khampeek te' kiang pan kiza hi. Norway ah Zomi kitawm likliak kawmkal ah Zomi khatin a nusiat ciangin, a khua khua pan sivui dingin buai khengkhang uh hi.
Norway ah Pa Thangta sihna tungtang ah Australia pan Pu Zokhai zong July 14,2013 ni-in Norway tung dinga, Sewden pan zong Zomi pawl khat paisawm cih kiza hi. Misi luang pen July 18, 2013 (Thursday) ni ah kivuithei taktak ta ding cih thu Sia Khampeek in gen hi. Mai lam hunte zongah Zomite gam leh minam a it semsem ding le kithutuak tak le lawptak in mapang khawm thei den ding Topa Pasian in thupha hong pia hen. Delhi a om Zomite' kipumkhatna in leitungbup Zomite hong khanglosak mahmah ahih manin, Delhi Zomite Topan thupha hong piaksak hen.
Ref: Pa Khaibawi ( New Delhi, India) via Tongsan
