June 30, 2013 ni-in, ngimna om mah bangin, Canberra Khuapi, Kawlgam Palai zum mai ah lungphona Pasian thupha hangin, buaina om lo in, ki nei thei hi.Hih lungphona pen World Zomi Congress te vaihawmna tawh leitung bupa om Zomite tungah cialna hong neihna tawh ki zui-in, Zomi Association Australia in WZC nungthuapin a ki sem a hihi.
Australia mah bangin, gam tuamtuam a om Zomi kipawlna te in zong lungphona a nei ciat dingin kong lamen uh hi. Gullu mual tawhna ding tawh kisai-in, Zomite bek hi lo, Gullu mual kima om mite tungah bang mah kuppihna om hetlo in, galkap kumpi in, a mau thutawh a sep uh hi a, ei gam ih cih hang, ei thu kizang hetlo a hihna ki lang mahmah hi.Tua a hihman-in, ZAA in WZC te vaihawmna pen thukimpih bek tham lo, a ki sapna mun ah hih theih bangin, panla dingin ki gingsa a om banah septheih pen a kisem pah a hihhi.
Australia ah Zomite a ki gawm in, 800 bang ki om ding hi na pi, Australia pen gam zai mahmah a, ki kawmtuahna ding baih het lo hi.Tua banah, Canberra khuapi ah Zomi ki om nai lo hi. Zomi a tampen na Melbourne khuapi hi a, tua zom ah Brisbane leh Perth khuapi te a hi hi. Melbourne panin Canberra khuapi pen kilometer 700 bang ki gamla a, tuateng a, lungpho va neih pen thu baih hi het lo hi. Lamsap mahmah zong tampi bei a, a pai mite a mau leh a mau lamsap ki sik a pai a hi hi.A hizongin, ih minam leh Zomite zong ki thutuak thei minam ih hihna lahna a hi kawm leh ih gam ih neihsa ih leitang tungah thuneihna neilo bek tham lo hong ki simmawhnate pulak khia dingin, WZC in hong vaihawm ciangin lawptaka, ki pai a hi hi.
Hih lungphona ah Melbourne pan-in, Bus nih tawh ki pai a, Queensland State Brisbane khuapi, New South Wale state Coffs Harbour leh Wollongong khuapi te pan zong Meileng,Vanleng leh Mawtaw tawh Zomite ki kaikhawmin, Kawlgam palai zum mai ah lungphona ki nei a hihi.
Mailam ah zong Zomite ki thutuak a, ih gam leh minam a dingin, ih hih theih bangciata, nasem khawm zel dingin, ih biak Pasian in thupha hong pia ta hen.
Nangkhankhup Naulak
Secretary, ZAA
31/8-10 Emma Rd
Croydon, VIC 3136
