Zomi Siamsin Kipawlna, Kalaymyo te'
vaihawmsiamna tawh zani, July 22, 2013 (monday) 12:00-3:30 PM.
sungteng "Pupa' Banzaal" cih min vawhin EFCM Hall, Tahan ah hun
thupitakin kizang thei hi.
Yangon panin lenglapi dingin Pu Lengtong Kam Khen sam uh a, amah mah
in hun hong makaih a kitangtai mahmah tek hi. Tedim pan a hong pai
ding Revd Gin Hau Pum pen hong kihel thei lo hi.
EFCM Hall pen nasiatakin na puah khin ta uh a, sualtung pen tamantalen
a phah uh banah tutphah hoih sitset vive a sung dimin koih uh hi. Tua
ban ah Cinima hall danin mipi' tutna pen a mailam niamsak uh a, vekpi
in Stage tung kimu khin ahih manin lemtang mahmah hi.
Siamsin lam panin Zam Thuam in hi thu hong pianna leh mailam
Siamsinte' ngimna, lunggulhna cihte hong gen a, thangahhuai kisa
mahmah hi. Siamsin min mah tawh Tg.Zam Dong (Ph.D) Philoshopy zo thak
zong pahtawina laipi piakna nei uh a, Tg.BiaMung siamsin in pia hi.
Lungdamkohna pen tulaitak Tongsan editor a sem, Tg.Mung in nei hi.
Revd Pau Khan Khai in Siamsin tawh kisai bulphuhin hanthotna tomkim
cingtakin hong nei a, thupi kisa mahmah, tha kingah mahmah hi. Siamsin
te'n thuman leh citaktakin nong mapan nak vua leh na nung vuah na
mipih khempeuh uh a kiding ahi hi, cih zong gen hi.
Lasakna zong kinei toto a, Siamsin group, Duet, Solo cih a kipan,
khangthak lasa siam pawlkhat zong kihel uh hi. CK.Khai bang in pen
tulaitak a i flim minthang mahmah ahi, Penglam 3 sung a, "Lem in cia"
cih la, Pasian' la tawh na phuak pah a hong sak leh mipi in tha kingah
lua mahmah ahih manin tawkaang' sa in kingai bek hi. Pu Lengtong Kam
Khen mah in zong hong zai a, thangahna vive hi a, nuam kisa mahmah hi.
Mipi lam panin Lengtong Kam Khen' tungah dotnop bangbang lai tawh
kipia a, GTC Siamsin lampanin Tg.Pau Tawi Thang in dotnate simna hong
neih khit teh Pu Lengtong in dawnna hong nei to ziahziah a, nuihzakna
tam mahmah hi. Thukhel nono pawlkhat kidong ta leh lawmpa pen buai
deel lo hi.
Siamsinte' fund ding ngaihsutna tawh lut man Ks.1,000/- ki la a, mipi
pen hall dim zihziah mahin kipai hi. Mailam ah siamsin i cihte pen a
kisin sin lai (Lengtong Kam Khen cih bangin) ahih manun panpihna a pia
zozo in phawksiam huai mahmah uh hi, i ta i neu te hi, thapia kawmin
pahtah ciat ni, cih i kizasak nuam hi. Hun zawhna dingin Siapi Vum
Lian Pau in lungdamkoh thungetna hong nei a, 3:30 Pm.hun in nuamtakin
kizo zo hi. Hun man ciangin Lenglapi diak pawlkhat leh Siamsin makai
teng group photo lakna zong kinei hi.
NB: (1) Siamsinte zong vai hau uh hi ding ahih manun tu ciang report
ka muh loh teh ka panpih theihna pen hi'n teh ci-in hizah a kihawm
sawn i hi hi. A kei na lei-lei zong bangmah lopi lenglapite' tutna ah
hong tukhawmsak uh ahih manin angtan buang maizum sim buang khatin ka
om hi. Thu-le-la tawh kisai a hi a, photo ahi zongin a kisam lai te
amau hunsak danin hong zo to le uh ci hang. Video Photo ka lakkha
pawlkhat hong khak ing, na na etsak un.
(2) Tutunga hunbawlna teng pen Zomi sungah Video Studeo min nei masa
penpen leh tuni ciang a mapang uh ahi, Minuamsa Video panin
Tg.Khaitawng makaihna leh Camera hoih nono 3/4 tawh record bawl uh hi.
Khui hawmkhiat ding geelna nei uh ahih manin kuaman copy sawn sak loh
ding hong thuum khol uh hi. Khui hong suah ciangin zong thapia ciat
ni. Hoih zong hoih mai ding hi, cih kimu thei hi.
Deihsak thupuak,
Peter Khampu
--
Peter Khampu
CMedia, Kalay
"...Na hoih sep ding cimtak kei ni, a hun a tun' ciangin a gah i at
ding hi" (Gal.6:9).
--
Peter Khampu
CMedia, Kalay
"...Na hoih sep ding cimtak kei ni, a hun a tun' ciangin a gah i at
ding hi" (Gal.6:9).
+letsong+piakna.jpg)
