ZCD in Malaysia gambup a Zomite omna pawlpi tuamtuam giat val bang va pha kawikawi khin hi. Tutung Sunday (07/07/2013) pen ZCF Damansara ah pawlpi kem Sya Khup phalna leh deihsakna tawh va kihawh a, ava ki lawhcing mahmah suak hi. ZCF pawlpi in minam vei pawlpi ahihzia pen biakinn sungah Sya Khup tawh khut ka kilet laitak un ZCD Longform hong dong masa hi. ZCD pen Zomi Congress for Democracy ka ci pah uh hi. “ Aw hi maw, Zomi Cidamna Ding cileng aive” ciin maitai takin hong muak hi.
Biakinn sung ahihmah bangin pawlpi thu leh Pasian thu tawh kisai tampi zaak khit ciangin Nek khopna kibawl a, kumcing khin teng lakah a tamzaw in Khomun leh Lenggah tui ki ne in kidawn hi. Nek khop bawlna ah ZCD(Mlys) zong va kihel thei ka hihman un khalam leh upna lam panin lungkimna bang hiam ciang khat kingah a, Pasian thu sungah zong kimoi suah tuam mahmah pah hi cih ding hi. Sermon leh adang tuamtuam khit ciangin pawlpi makaite thusiamna tawh ko ZCD lampan in minam thu genna hun kicing takin hong pia uh hi. Hun kicing tak hong kipiakna sungah hawmthawh huai het lo in ZCD lampan Pa Lianneu in Minam nasepna, Politics leh Pasian nasep a kilamdan lohzia hong gen hi. Thugen hun aman khit ciangin aza angai khempeuh in khut bet ziahziahna tawh a thukimna uh hong lakkhia uh a, “ Ih minam ading nasepna ah kozong ka hih theih zahzah un hong huh in hong panpih ding hi ungh” ciin ka khutte uh hong len uh hi. Lawp huai in thangah huai mahmah hi.
Hun man khit ciangin ka kikhen uh a,a sawt lo a Reverend Puantual ngah ding ahi Sya Mung (Teeklui) in Sen ansai ah hong khawlpih in, tualai ah nekawm dawn kawmin thu tampi tak ka kikum khom uhhi.
zcdmlaysia.info
