Norway ah Gullu Mual Vai Lungphona Lawhcing

Pasian in i thungetnate hong lawhcing sakin Gullu Mual vai Lungphona tawh kisai Norway a om Zomite in zong hungeelna omsa bangin July 28,2013 (Sunday), 3:00Pm-5:00 Pm  sung buaina om loin Norway kumpite' phalna tawh Oslo City, Parliament Innpi mai ah lawhcing takin kineithei ahih manin Pasian min i phat hi. Hih lungphona-ah Oslo City pan Meileng tawh nai 8 val akipaina Stavanger khuapi pan Sia Khampeek, Trondheim khuapi pan Sia Thang Khan Thawn te zong va kihelthei uh hi. Oslo khuapi pan Pa Hau Khaite innkuan, Pa Thang Sian Khai, Pa Hau Dalte nupa, sanggam Kachin te Tg. Mai Mai, Kawlte Ko Myint Aye, Ko Saw Kyaw Oo te zong hong kihelthei uh a, mivekpi 12 kipha hi. 

Lungphona hunah WZC Diallap (Flag) kikhai-in, Puansanpi tung le Laidalpite tungah Zomite' lungdeihna laimal tumatuam kigelh hi. Mikanglai (English) tawh kibawl Lungphona i thupulak (Statement) pen Sia Khampeek in simkhiatna nei-in, kim le paam a om mipite ahi mivom, mikangte in daitak kingai khipkhep hi. Tua banah mipite otna kinei to suakin " Gullu mual le Uiphuk mualpi... Kem in, Dal ni.!!!, Thein Sein kumpi,,, Deihlo...Deihlo..!!! ci-in mipi ki-awng ziahziah hi. Tutung Gullu mual vai Lungphona pen Norway gamah Zomite' lungphona masa penpen ahih manin, kilungkim mahmah hi. 

Norway gamah Zomi kitawm mahmah kawm kalah Lungphona cih a telcianlo tampi mah ki om ahih manin pawlkhatte lau mawkmawk uh a, pawlkhatte leuleu  a awlmawh hetlo cih bangin ki om ahih manin, lungphona ah mi kitawm mahmah hi. Hih bangin muhna toi le ngaihsutna hoihlote Zomi sung pan hemkhia in, gam le nam vai ah kipumkhat a, akisepkhop liailiai theihna ding thungetna ah phawk ciat ni. Lungphona kipat ma hun ciangciang mi atam pen 4-5 bek kipha ding dinmun ah ki om ahih manin, akilunghimawh mahmah kawm kalah Pasian in a hunlap in i sanggam Kachin le Kawlte in hong panpih thei uh ahih manin Zomite' gitnatlohna tampi hong selsak uh suak hi.

Tua bek tham loin, lungphona ding a kisampi pen ahi Norway kumpi tung pan Phalna lai le thu le la hong vansak Sia Thawn le Sia Khampeek te ahi zongin, Lungpho zia ding vai kisam tuamtuam hong vansak ahi Inntek Pa Thang Sian Khai (Oslo), le 8888 makai khat ahi Ko Myint Aye te' tungah Lungphona Piangsak Committee tangin lungdamna lianpi i pulak hi. Lungphona mankhit ciangin Pa Hau Khaite innkuan in makaite nitak an nekpihna nei in, tua laiah lungdamkohna le thungetna zong kineikhawm pah hi. Bangbang ahi zongin Norway gamah Zomite in Gullu mual paulam in lungphona akineihna pen Zomi min mahmah a lamto/ a kitheikhia semsem i hi hi. Tua ahih manin, Norway Zomite sung mahmah ah thukiman diamdiamna le gam le nam vai ah Khanlawhna, thu theihna thupha hong om theihna ding thungetna ah mapanpih ciat ni cih kong tangko uh hi. 

src: tongsan