Zomipih akuamahpeuh,
Zomi Innkuan Buffalo te ZCD huhna sum pen mangthang hi cin ZIB member Dal Mung leh Sawm Tun in group net te sungah ong pulak khiat tungtang in net member tampi in zong ahoih tawh ahoih lo tawh i kuppih ngeingai hi.
Tua tawh kisai kitelkhialhna a om nawnlo ahihangin keimahmah kam -1-2 kong pau loh phamawh in ka tuat hi. Hibangin net sunga minthan ding leh ki dawn2, kisel2 ding, ki mawhsak ding, tungnung kituh ding cih te pawl ka ut het kei hi.
ZCD HQ pan GSpu i ong Thacialna pen minam itna tawh kana sang kha hi. Thacialna ngah kha palai teng kakikup uhciangin kei omna tawh kinai pen cin Buffalo, NY lam contact ding ong kiseh hi. Buffalo pen a khua zong tung ngeilo, i Zomi te lah meltheih kician neilo kahihmanin Lawm Sawmlian tungah huhna ngenin aman Makai Sia Peter Mang tawh ong ki zom sak hi. Tua pan kipanin thu leh la khempeuh Sia Peter Mang bek mah tawh ka ki thuza uhi. Adang te hilh nuamlo cih bang hilo in adang katheih a omloh man ahihi. Lawm Sawmlian in makai muanhuai mahmah hi ong cih ciang amah ka muan bangin ka muang pah hi.
Sum khakna tawh kisai:
Friday (June 28) ni in Palaite sum kaihkhopna ah sum khak dingin ka lunch hun (1:00pm) in email leh bank account ka checka ZIB te sum ong lut nailo ahihmanin khak ding omsa teng ka khak hi. Tuazawh nitak lam 2:30/3:00 kiim in Sia Peter Mang in sum ong thun dan hi. Ken manlahna tuamtuam tawh Monday ni dong ka email leh Bank ka enkik man nawn kei hi.
Monday ni zing ka email kahon leh Dalmung leh Sawmtun in Tongsan leh Zominam groups te sungah "sum mang" na tang ko uh ahihmanin ka lung himawh in ka sim leh kei tunga ong khak pen uh ana hihi. Ka bank ka check leh Friday nitak lam in ong thun uh cih ka mu hi. Tuaciang kei zong Sia Peter Mang sum ngahna email tawh ka hilha, seppih Palai teng zong ka hilh pah hi.
- Ken pen ka genmah bangin ZIB makai/mimal dang ka theih omlo ahihmanin leh Sia Peter Mang bek tawh ki contact kahihmanin amah bek mah hilh sawm kahihi. Aman ZIB te na hilhsawn ding cih kei ngaihsut dan hi.
- Dalmungte Sawmtunten phone ka setset uh ci hi, tua phone pen ka company cell phone hi in weekend ah ka zang kei hi. Tualo kiho khamah leng zong Sia Peter Mang phalloh in sum tawh kisai kam khat zong kahilh kei ding hi.
- Friday ni nitaklama sum kikhak pen 24 hour khit ciang kei Account ah on lut pan ding hi. Weekend Saturday, Sunday in hal ahihmanin ngaisun thei hi le uh Monday nitak dong ong ngak dinguh kilawm ahihi.
- Zominam groups sungah Dalmung I ong tangko pen Monday ni zingsang ahihmanin manlang lua leh kimuanloh vai lua kasa hi. A simkha akuamahpeuh in lamdang kisa hi. Ei Zomite ngeina dan mahin thu tello, akisailo honkhatin kuppihsuk buakhuansuk gawp lailai ihihmanin athu pen ong gin ngaih mahmah hi.
- Groups te sungah hibangin iki selpho ka simkhak ciangin thuaknop kasa hetkei a banghangin hibang buaina ding leh minsiat nang peuh kei leh kei kiguanguan kahiam cin ka ngaihsun ngeungeu kha hi. Ka innkuanpih, unau sanggamte ading zong ong nop hetlo hi. Minam itna Ici tateu zongin I tha ong dah mahmah hi.
-ZIB te panpihna sum pen kei khut sungah tawmvei zong kem ngam nawnlo kahihmanin 7/3/13 (Wednesday) ni in Palaite sumkholkhopna ah kana khak pah hi.
Kei zong Palai kasep hang sep ding neilo, aman lua a asem ka hi kei hi. Kei innkuan kivak nang nekzawnna ka nasep pen zing khuavak pan khuamial dong ahihi. Khatveivei weekend zong overtime kisem thei lai hi. Tualo innkuan tanau vai, vai nengneng sep ding van ding kihau mahmah hi.
Palai sep hangin pia nga tangsan khat zong kilawh kha lo banah, ei ip sung mahmah panin midang khempeuh sangin atamzaw kipia khia kha ahihi. Mimal/ kipawlna khempeuh ah maitang singhawngbelh in kilut, kiphu hi a mun khenkhat te ah $ pek khat zong ngahlo in Tanghkhatui kihawp kha gawp thei lai hi.
Bangbang hileh I sum pen mangthang hetlo, tuisuak hetlo a atunna ding tungta ahihmanin I lunghihmawhna te zong bei dingin ka um hi.
Dalmung leh Sawmtun zong mimal in ka muh ngei lohang Sia Peter Mang gen dan ahileh minam it mahmah, vei mahmah ahihmanun deihsakna tawh ong kipei uhi cin ka telsiam hi. I kikal a communication gap a om hang hi cin ka koih hi. Nidang ciang group net te sungah i khah ma in a impact bangci thei ding cih khinkhai siam ni.
Weekend ni-2 sung bank account leh email, phone missed call te ana check khalo keima mawhna himasa ahimanin Sia Peter Mang leh ZIB makaite, mipiten ka kicinlohnate nong maisak dinguh kong ngen hi. Mi tampi tawh na isep ciang hici bang thu nengneng a om thei mah hi in tuate hangin I minam itna leh I panlaknate bangmah ki lamdangsak hetlo dingin zong kong muang hi.
Zomi Innkuan Buffalo ten minam na itna uh leh na mapannate hangun ZCD Thacialna ngah Palaite tang leh kei mimal mahmah in lungdamna kong ko hi. Topan a Thupha tawh hong thuk tahen.
Zomi sungah na sanggamuh,
Suan Mang.
910 Hooper Ave
Apt#C
Baltimore MD 21229.
Phone: 410-306-5477 (Cell)
202-498-4423 (Office Cell)
Genbeh: (Tuni a kipanin hih ZIB te ZCD huhna sum tawh kisai in theih nop a om leh kei mimal, ZIB makai Sia Peter Mang leh ZIB makai lui Lawm Sawm Lian te tungah ong gen unla groups net te sungah khahkhah nawn kei ni cih zong net member Zomipih akuamaciat kong thum nuam hi.)
