 |
| Click Here For More Photos |
Khuamial sahpi banga Kha thu lamah a om Kawlgam ah Pasian' khuavak
puak a hong pai masa pen, Adoniram Judson leh a zi hong tun zawh (Kum
200) cinna pen Kalaymyo a pawlpi lian mahmah nih ahi, Tahan Tuiphum
leh Leipite in zani, July 14, 2013 (sunday) ni-in limphatakin bawl uh
a, thupi leh lungkimhuai mahmah hi. Hong tun ni pen 13 ni hi a, 14 ni
pen nipi ni ahih ban ah Judson Sunday tawh kituak ahih manin tukum pen
a lem mahmah hong suak hi, ci-in kigen hi.
TAHAN TUIPHUM TE' ZAT DAN:-
1. Tahan pawlpi, MF te' hanciamna tawh Judson Kawlgam hong tun ni,
July 13, 2013 ni-in han ah Zawngtah kung 50 suan uh hi.
2. Pawlpi mite khat i thusiamna tawh Galkap "Benkhaza" siate khat
hong paipih a, tua pa in "Peengkul" mutna tawh pulpit tungah lahna
hong nei a, thupi kisa mahmah hi.
3. Tahan Tuiphum Pawlpite in zinghun (Am.10:00) hunpi-in zang uh hi.
Tuatak ah Pasters teng leh Upa nih in pulpit ah mun la uh a, Revd Dr
Man Hau Cing (Th.D) Asst.Pastor, TBC; G.S, KVBA in Mualsung honna nei
hi. Mualsuang pen Pulpit tungah mipi tawh limtak a apna leh hun limci
pen zat theihna dingin phut nai lo a, sabuai tung ah koih phot uh hi.
4. Pulpit nungah Judson leh a zi teng 3 Poster tawh limtakin suang uh
hi. Hun sungah a tuamtuamte pen Bulletin bangin amau hun ciat ah hong
ding lianlian uh hi.
5. Judson tangthu genna pen Pastor 3 un zang uh hi. A masa-in Ptr.Zel
Zam Vung hi a, a nihna-ah Ptr.Eloi Thawng Khan Khai (Asst.Ptr) leh a
thumna pen Revd Job Nang Khaw Thawng (Church Pastor) in hong nei to
ngiatngiat uh a, thugente lah siam thei-in mipi' lungsim hong la
mahmah ciat hi. Zatnop lah kisa buang, a thuakna tuamtuamte uh i
ngaihsut ciangin lah i khasiat bang hong suakin a nehnop ki-om simsim
dan hi.
6. Woman Felloship (WF) ten Judson lapi hong sa uh a, Men Fellowship
(MF) ten zong hong sa uh hi. Tua banah Youth Fellowship, khangno tampi
tak mah in hong zaih ziahziah uh a, i Zomi puan leh nikte mah silhtek
uh a, etlawm thei, standard nei mahmah uh hi. Tua zom ah Lia Zambawi,
lasiam nu in zong "Sangmang La" hong sa hi.
7. Hun man ciangin mipi khempeuh niangtui leh moh tawh vaak zihziah uh
a, tuatak ah pawlpi sungah Siavuan thak a neih uh Lia paal MB,BS te'n
zong tanu sem keei uh a, pawlpi etlawmsak tuam mahmah hi. 1:00 PM in
hun kiman siang ta hi.
LEIPI TUIPHUM TE' BAWL DAN:-
1. Leipite in sun/nitak lam hunin zang uh hi. 1:30 Pm. pan kipan uh
hi. Pawlpi sagih sam uh hi. Hun-ap thungen Lic.Gin Go Kap (Evan. Agape
A.G), A huampi thungetna, Revd Dr Huart Cin Thang (Lai Siangtho
siapipa) in nei a, hun masa tawpna thuphapiakna pen innteek pawlpi
kem, Revd Sian Za Mung in nei hi. Sapna lai a tuam a ngah kha lo
pawlkhat in nai nih kisa ahih manin a mu kha lo honpi khat ki om a, mi
dinlet zihziah hi.
2. Leipi pawlpi, Kawlhun Dept.makaihna tawh July 13, 2013 ni-in Dowai
han thak gei teng ah (singno kun 200) Judson phawkna-in suan uh hi.
3. Hun nihna-ah U Gin Khan Kap in hun-uk sem hi. Ptr.Ciin Lian Cing
in Judson tangthu tom genna nei hi. Revd Sian Za Mung in hanthotna nei
hi. Judson phawkna tawh kisai la a kiphuak (Kawl la) kidemna zong nei
uh hi. Leipi pan group nih kisuah, Emmanuel, Taungphi la Baptist
(Falam), Pinglong Baptist ahi uh hi. Zaknop thei, siam thei mahmah tek
uh hi. Tua lo Myothit Tuiphumte' mission lampan Kawlteng in zong la
hong sa uh hi. Revd Sailas Lang Khan Mung (Asst.Ptr.Leipi) in tawpna
thupha piakna hong nei a, 4:45 PM.hunin kiman ta hi.
4. Hun man ciangin mipi a pai khempeuh moh leh niangtui tawh vak
zihziah uh hi. Ni khat sunga hibang hun manpha mun nih ah ka kihel
khak manin hampha zong ka kisa hi.
**** Tedim gam a te'n zong TBC min tawh CMBC ah limtakin bawl uh a,
Yangon MBC zum panin Siapi 3 zong kihel thei, cih kiza ahih manin
thupi leh lungkimhuai ka sa mahmah hi.
Peter Khampu
CMedia, Kalay
"...Na hoih sep ding cimtak kei hi, ahun a cin ciangin a gah i at ding
hi." (Gal.5.8).
