Thu Masa
Ih biak Pasian in Zomi te hong ompih in Kawlgam, India leh leitung gam tampi hong puak aa hong kalsuanpih toto cih ih muh man in ih biak pa Pasian min ih phat hi.
2010 kum aa Tedim khuapi ah ih bawl Cope Jubilee pawipi sung aa hong pai sungpan makaipi 70 te khensat na leh mipi tul tampi te kipsakna ah om bang mah in, mailam zomi bup in a nungta Pasian bulphuh in, ki pumkhat aa, a bucing khantohna ih neih nading ngimna tawh "Global Zomi Alliance" (GZA) "Leitungbup Zomi Kipawlna" hong piangkhia hi.
A masa pen GZA Makai Khawmpi December 13-18, 2011 sung Agape Church, Kalay Myo ah ki nei aa Zomi makai 344 hong kihel thei uh hi. Committee 15 te bulphuh in thu kikupna nasia tak in kinei thei hi.
GZA Maban
A beisa kum nih sung Kawlgam kumpi ki ukna tawh kisai lamet ngamloh zahdong in nakpi tak in hong kikhel na hang in GZA ii pan mun lakzia ding leh kalsuan zia ding zong khua hun zui in lung ngaih toh ding kisam a hih man in a masa lam aa gelna zah in ki nawh kalsuan nailo hi. A hizong in GZA nungkin loding aa, mainawt ding hi.
A 2 Veina GZA Khawmpi November 7-10, 2013 Sung Tedim Khuapi ah Omding
A beisa hun aa hong ki zaksak na ah GZA Khawmpi Tedim ah November Sunday nunung pen (GZA Sunday tawh kituak in) ki bawlding cih a hihi. A hizong in, American Missionary Adoniram Judson kawlgam hong tunzawh kum 200 cih na pawipi tawh a hun kinai sak luat loh ding hoih kisa a hih man in, "A 2 Veina GZA Khawmpi" pen Tedim khuapi ah November 7-10, 2013 sung neihding in Central Committee in khensat na nei hi.
November 7 pen zintun ni hiding aa, November 8-9 sung meeting ki nei in, Nov. 10 (Sunday) nitak in khawmpi man na biakpiak kikhop na kinei ding hi. November 8-10 sung nitak sim in mipi tawh Pasian biakpiak na service kinei ding hi.
Tutung khawmpi sungah hong kihel dingin, GZA Committee 15 pan member khempeuh, Tedim Township, Tonzang Township, Cikha Township pan khua hausa khempeuh leh, gamsung gampua pan kipawlna tuamtuam leh mimal tuamtuam te zong kisam ding hi. Nitak biakpiak na hunsung ah mipi a ut khempeuh kihel thei ding aa, sunsung thu kikup nasung ah sapna a ngah mimal te bek ki helthei ding hi.
HIh khawmpi tawh kisai in GZA Local (Tedim) Commitee in a ki tangsam bang in innteek hongsem in, vai hong hawm ding uh hi. Zindo na leh vai kisam khempeuh ah Tedim khuasung aa om biakna pawlpi khempeuh leh kipawkna tuamtuam te in a hithei zah aa mang hongpan ciat nading un Central Committee pan kicial hi.
Hih ih khawmpi in leitungbup Zomi tawh kisai khawmpi a hih bangmah in a kisam ding sum leh pai te zong innteek te ban ah, leitung mun tuamtuam pan Zomi khempeuh in ih hih theih zah aa ma ih pan khop nading in, a hunzui in Central Committee pan hong ki zasak ding hi.
GZA Magazine Kibawl Ding
Mai aa khawmpi lap in GZA Magazine kibawl ding hi. Tua tawh kisai a vaihawm ding in Magazine Committee kiseh khin hi. GZA Magazine Committee chairman ding in Rev. Khoi Lam Thang kiseh hi.
Theihsakna: GZA tawh kisai a hizong in, GZA Khawmpi tawh kisai a hizong in a theih beh nuam leh dotnop a neite in, hehpih na tawh net tuamtuam pan "zau gen" lo in GZA-GS tung ah lai nongkhak nading un kong zasak uh hi.
A teltuam Israel mite ah ompih bang in vanglian Pasian in leitungbup aa om Zomi te leh Zogam thupha hongpia in hong makaih den ta hen!
Lung laulo aw Zogam lei aw, sawt nawnlo ding! Sian in lumbang hongsung ding aa nibang tang ding!
Central Committee Tangin,
--
Chin Do Kham, D.Min., Ph.D.
General Secretary
Global Zomi Alliance
GZA Thu Bulphuh leh Ngimna Bulpi te
I. Kipawlna Min
Hih kipawlna min in “Global Zomi Alliance” kici ding hi.
II. Kipawlna Huam
Hih kipawlna in leitungbup a om Zomi khempeuh a huam a hihi.
III. Minam Min
Tangtawng a kipan i pu i pate “Zomi” ci-in na kilo uh ahih manin, i minam min pen “Zomi” mah kiciden ding hi.
IV. Vision (Ngimna)
Hih kipawlna in a nungta Pasian bulphuhin Leitungbup Zomite kipumkhat a, a bucing khantoh nading ngimna tawh kipawlna ahi hi.
